April 4, 2020 23:53
Македонија

Рускоска: Груевски го организираше „крвавиот четврток“, а кукавички избега

Обвинителството ќе докаже дека обвинетите кои седат во оваа судница изготвиле план со намера за загрозување на уставниот поредок и безбедноста на државата со акти на насилство да спречат мирно примопредавање на власта како резултат на што беше настанот што се случи на 27 април 2017 година познат како „крвавиот четврток”, е дел од обвинителниот акт, што денеска во судница на рочиштето за судскиот процес за организаторите на насилствата од 27 април го прочита обвинителката Вилма Рускоска.

Во Основниот кривичен суд во Скопје денеска се одржа рочиште за судскиот процес за организаторите на насилствата од 27 април во Собранието. Судскиот процес се наоѓа на почеток, а минатото рочиште се одложи за обвинетите да извршат увид во доказите од предметот.

-Основното јавно обвинителство ќе докаже дека обвинетите изготвиле план да ја загрозат државата за да нема мирно предавање на власта. Секој од овие обвинети е коцка од мозаикот. Ќе слушнете дека биле во штабот на критичниот ден. Ќе слушнете дека Вељаноски бил во Собранието и не знаел за никаков план, а Атанасовски дека бил на ракометен натпревар и таму дознал за немилиот настан. Ама не е така. Ќе слушнете поинакви сведочења и други докази, изјави во својот уводен збор обвинителката Вилма Русковска, читајќи го обвинителниот акт против четворицата обвинети „мозоци“ за насилството кое се случи на 27 април пред две години во Собранието на Македонија.

 

– Ќе ви презентираме докази како Јанакиески и Ристовски го организирале народ. Ќе ги слушнете пораките кои тој ден се испраќани до членовите на партијата ВМРО-ДПМНЕ. Тие што ги отвориле вратите во Собранието тоа им било кажано од сега обвинетите и од Никола Груевски, кој кога требаше да се соочи со правдата кукавички избега. Вељаноски постапи спротивно на Дневниот ред, и се допишувал со Никола Груевски. Не го спречи пратеникот Зеќирија Ибраими да ја испее химната на Албанија, што беше иницијална каписла. Вељаноски ништо не стори да го спречи лудилото. Неговиот шеф на обезбедувањето Горан Ѓошевски им помогна да стигнат до сала број три каде што беа пратениците од новото парламентарно мнозинство. Атанасовски тогаш директор на УБК ги организирал членовите на Александар Василевски – Нинџа и водачите на патриотските здруженија. Тој лицата Оливер Радулов и Сашо Марковски ги испратил да ги одземат дисковите од надзорните камери од Собранието за да не се види тоа што се случило тој ден, рече јавната обвинителка.

 

За да се добие комплетна слика за овој настан, додаде таа, треба да замислите мозаик секој од сега присутните обвинети претставува една коцка. Истакна  дека доколку фали една коцка мозаикот е непотполн и токму нивните поврзани и усогласени дејствија го претставуваат тој мозаик.

Додаде дека досега само Александар Василевски Нинџа од осудените е предложен како сведок.

Рускоска воведните зборови ги заврши со цитат од Гоце Делчев.

„Јас не познавам друг народ кој повеќе страдал од предавствата на своите синови – изроди како македонскиот. Историјата не памети друг таков пример кога еден ист народ по традиција, јазик и вера се разделува на разни спротивни страни, една од друга потуѓа“.

-Дали има докази или нема ќе одлучи судот. Не е ниту на обвинителството, ниту на одбраната, односно на обвинетите. Тоа што Трајко Вељаноски и Спиро Ристовски изјавија дека се жртви на политички прогон тоа е нивно мислење и се надевам дека тоа мислење ќе го поткрепат со нешто, рече Русковска, одговарајќи на новинарски прашања по завршување на рочиштето.

 

Обвинети во овој предмет се поранешниот претседател на Собранието Трајко Вељаноски, ексминистрите за транспорт и врски и за образование Миле Јанакиески и Спиро Ристовски, како и поранешниот директор на УБК Владимир Атанасовски.

Тие се товарат дека сториле кривично дело „терористичко загрозување на уставниот поредок и безбедноста”. Јанакиески, Ристовски и Атанасовски се во куќен притвор.

Судскиот процес го води судијата Илија Трпков, а застапник на обвинението е Вилма Русковска.

Според ОЈО, осомничените на почетокот на 2017 година подготвиле и реализирале план со намера да оневозможат мирно примопредавање на власта. За таа цел, ги организирале и материјално ги поддржале масовните протести, најпрвин пред Државната изборна комисија, а потоа и протестите на движењето „За заедничка Македонија” кои кулминираа со насилното влегување во Собранието на 27 април.

Поврзани вести

(Фото) Две лица на Чаир во викенд-полицискиот час

Igor

(Видео и фото) Стравот кај кумановци очигледен, во градот како да застанало времето

Igor

Филипче: Пет починати, 53 новозаразени од коронавирус во земјава

Valentina