August 13, 2022 20:47
Свет

Русија негира дека подготвува инвазија на Украина

Русија ги отфрли извештаите на американските медиуми за потенцијален руски напад врз Украина, обвинувајќи го Вашингтон дека се обидува да ги влоши работите.

Повикувајќи се на официјални лица и разузнавачки документ, Вашингтон пост во саботата напиша дека американските разузнавачи веруваат дека Русија потенцијално планира офанзива врз Украина, можеби веќе следната година, во која ќе бидат вклучени до 175.000 војници.

„САД спроведуваат специјална операција за влошување на ситуацијата во врска со Украина и ја префрлаат одговорноста на Русија“, ја цитираше изјавата на портпаролката на руското Министерство за надворешни работи, Марија Захаров, весникот „Комерсант“.

Соединетите Држави, нивните сојузници во НАТО и Украина ја обвинуваат Москва за групирање безбедносни сили во близина на границата со Украина, а Киев стравува дека Русија планира напад.

Москва ги отфрла тие тврдења и го обвинува Киев дека исто така ги групира своите сили за да нападне територија контролирана од проруските сепаратисти.

Москва нагласува дека има право да распореди војници на своја територија и дека тоа не претставува закана.

Американскиот претседател Џо Бајден во петокот изјави дека развива обемни иницијативи за да му ја отежне инвазијата на рускиот претседател Владимир Путин во Украина и дека нема да ги прифати „црвените линии“ на Москва.

Во наредните денови се очекува видео телеконференција меѓу двајцата лидери