November 26, 2020 16:36
Балкан

Пресврт во Црна Гора: Кривокапиќ не ги сака предизборните партнери во Влада, тие бараат да го врати мандатот

Мандатарот за состав на црногорската влада, Здравко Кривокапиќ му рече на лидерот на Нова српска демократија, Андрија Мандиќ дека за него, како ни за лидерот на Демократската народна партија и Движењето за промени, нема место во идната влада, пишуваат подгорички Вијести.

Весникот наведува дека Кривокапиќ го пофалил придонесот на Демократскиот фронт во кој беа Мандиќ, Милан Кнежевиќ и Небојша Медојевиќ против власта на Мило Ѓукановиќ но и рече дека на идната влада и треба „поинаков профил на личности“.

Според истите сознанија, Кривокапиќ таквата позииција ја образложил со ветувањето кое им го дал на гласачите на новото мнозинство дека после 30-годишното владеење на парититократијата на Демократската партија на социјалистите (ДПС), ќе му понуди на Парламентот, пред се стручна влада, но и политички јасно дефинирана како антирежимска и проевропска.

Според „Вијести“, Мандиќ побарал од Кривокапиќ да го врати мандатот доколку Демократскиот фронт не биде „рбетот“ на новата влада, а лидерите на тој сојуз не се во новата влада и дека ќе бараат нов премиер.

Кривокапиќ, пак, оваа понуда ја одбил и денеска на Твитер порачал дека ниту една партија од победничката коалиција не се исклучува од процесот на формирање на влада, но дека инсистирањето на поединци од тие коалции не е во интерес ниту на граѓаните ниту на државата.