December 5, 2021 12:44
Македонија

По 19 часот ќе гласаат сите кои ќе се затекнат во избирачкото место

Гласањето ќе се продолжи за граѓаните кои ќе се најдат на избирачките места и во дворовите на објектите по 19 часот, истакна претседателот на Државната изборна комисија (ДИК) Александар Даштевски охрабрувајќи ги граѓаните масовно да излезат и да гласаат на локалните избори. ДИК преку мејл ги известил општинските изборни комисии да ги информираат избирачките одбори за ваквата одлука.

Даштевски наведе повеќе причини за големите гужви пред избирачките места, како на пример дека избирачкиот список има дупло повеќе страни, поради рекордната бројка на гласачи. Право на глас имаат 1.824.864 гласачи, што е најмногу од сите локални избори досега и пораст од 10.220 гласачи во однос на изборите во 2017.

„Исто така, проверката на идентитет оди поспоро оти една четвртина од отпечатоците кои ги добивме од Министерството за внатрешни работи (МВР) се со лош квалитет. Имаме и ковид мерки, не смеат да се пуштаат многу луѓе во просториите. Насоката е да се пуштаат онолку гласачи колку што има паравани. Сакам да порачам дека гласањето ќе продолжи за сите кои се нашле во дворот на гласачкото место и после 19 часот. Оградата ќе се затвори, и сите кои ќе бидат затекнати во дворот ќе гласаат“, рече Даштевски.

Досега се поднесени 134 приговори за заштита на избирачко право, од кои 63 се прифатени, а десет се одбиени.