January 29, 2023 12:57
Македонија

Полицајци во Кочани протестираа поради суспензија на четворица колеги

Независниот синдикат на полицијата денеска организираше протест пред Одделението за внатрешни работи во Кочани поради суспендирање на четворица полициски службеници. Од собирот беше упатено барање до началникот на ОВР – Кочани и до Министерството за внатрешни работи да ги преиспитаат причините за изречените казни и поднесените кривични пријави против полицајците, кои се обвинети за злоупотреба на службената должност и овластувањата.

– Дајте да ја видиме работата, многу е сериозно, 4 лица си заминуваат. Чизмите пред мене се чизми кои ги фрлаат полицајците, заминуват што подалеку, не од Македонија, од Балканот заминуваат, бегаат и пасошите ги кинат-изјави Гоце Делчев Тодев, претседател на Независниот синдикат на полицијата.

Според нив Министерството треба да се занимава со гонење на вистинските криминалци, а не да се отпуштаат обични полицајци.

– Не може обичниот полицаец да биде криминалец ако се напие кафе во кафе бар или народно кажано, манџа ако јаде. Криминалот е во високите структури на државата. Гледате, ова е вече сериозно. Ако полицијата е угнетена, не може да си ја работи работата, под притосок работат, а тие што не се послушни по автоматизам ги суспендираат и не се само во Кочани, има во повеќе места, ова повеќе не е издржливо- изјави Марјан Ристевски, претседател на конфедерацијата на синдикални организации на Македонија.

На протестот се проклучија и од Полицискиот Синдикат на Србија, кој е дел од Балканската полициска унија, како и шумската, судската и затворската полиција , од специјалните полициски единици и пензионирани полициски службеници.