October 21, 2020 00:22
Балкан

Милановиќ: Хрватска не поддржува еднострана ревизија на Дејтонскиот договор

Хрватскиот претседател Зоран Милановиќ денеска во Загреб се состана со Милорад Додик, член на претседателството на БиХ од редовите на српскиот народ.

На состанокот се разговараше за состојбата во Босна и Херцеговина и нејзините евроатлантски перспективи, проблемите во спроведувањето на Дејтонскиот договор и положбата и правата на сите три конститутивни народи, Хрватите, Србите и Бошњаците.

„Интересот на Република Хрватска е стабилна и функционална Босна и Херцеговина, како и обезбедување на еднакви права на Хрватите во БиХ, како рамноправен и конститутивен народ. Затоа, Хрватска не може да остане пасивна и нема да поддржува иницијативи кон еднострана ревизија на Дејтонскиот договор, кои ќе ја загорзат стабилноста во Босна и Херцеговина и Југоисточна Европа”, беше истакнато во соопштението, пренесено од „Јутарњи лист”.

Како што е наведено, продолжувањето на дијалогот меѓу претставниците на сите три народи во Босна и Херцеговина е важно за реализација на стабилна и функционална БиХ, на која Хрватска, како пријателска и соседна земја, е подготвена да даде свој придонес.