June 26, 2022 02:12
Македонија

Маричиќ: Преку ИПА проекти за управување со органски отпад ги реализираме целите на Залениот договор

Вицепремиерот за европски прашања Бојан Маричиќ во серијалот ИПА проекти и искористување на европските средства, на својот фејсбук профил објави дека ЕУ дава финансиска поддршка за управување со органскиот отпад, бидејќи е важно прашање за заштита животната средина и е една од најсложените области во однос на усогласувањето со регулативите на Европската Унија.

Осврнувајќи се на проектот „Симбиозис” кој отвори нова страница во управувањето со органскиот отпад во општина Битола, вицепремиерот истакнува дека овој проект овозможил селективно собирање на органскиот отпад кој нема да се „фрла, туку ќе се преработува и од него ќе се добие компост кој ќе се користи како ѓубриво во своите расадници и на јавните зелени површини.

-Следејќи го концептот Индустриска симбиоза, Симбиозис (2018-2020), не е само придобивка во заштитата на животната средина, туку дава и конкретни социјални придобивки за локалните заедници преку подобро искористување на био ресурсите од прехранбената индустрија во корист на општествените активности и создавањето нови работни места, како и подобрување соработката помеѓу секторите и бизнисите во прекуграничната област, а со тоа да се подобрат локалните економии и да се поттикни претприемништвото, напиша Маричиќ.

Вицепремиерот и национален ИПА координатор вели дека Унијата ја поддржува земјава да ги постигне своите еколошки цели и постепено да ги подигне на ниво на стандардите на ЕУ.

– Вкупниот буџет на ИПА Програмата за прекугранична соработка со Грција 2014-2020 изнесува 45.470.066 евра, ЕУ и национално финансирање, а скоро половината, 22.735.032 евра се искористени во проекти од втората приоритетна оска – Заштита на животната средина-транспорт. Нашиот ангажман, кога станува збор за постигнување на целите од Европскиот зелен договор, е клучен за процесот на европска интеграција и ќе придонесе за поефикасно користење на ресурсите. Целта ни е транзиција кон чиста, кружна економија и мерките за запирање на климатските промени, истовремено обновување на биолошката разновидност и намалување на загадувањето, ќе ја поддржат економијата и ќе отворат нови работни места, напиша Маричиќ на Фејсбук.