January 20, 2021 14:31
Балкан

Во Федерацијата БиХ се слави Денот на државноста на БиХ, во Република Српска обичен работен ден

Федерацијата БиХ денеска го одбележува Денот на државноста на БиХ, затоа што во овој ентитет на БиХ се смета дека темелите на државноста на БиХ се поставени на 25 ноември 1943 година во Мркоњиќ Град, на седницата на ЗАВНОБИХ.

Во Федерацијата БиХ денеска е празник и неработен ден, додека во Република Српска 25 ноември не се слави како Ден на државноста на БиХ.

На ниво на БиХ, никогаш не е усогласен единствен Закон за државни празници, но постојат закони на ентитетите што ги дефинираат државните празници.

Во Република Српска денот кога беше парафиран Дејтонскиот мировен договор – 21 ноември е празник и неработен ден, што не е случај во Федерацијата БиХ.

Претставниците на Република Српска претходно предлагаа денот кога беше потпишан Дејтонскиот договор да биде прогласен за Ден на државноста на БиХ, но политичарите од Федерацијата БиХ не се согласија на тоа.

Во Федерацијата БиХ, свеченото одбележување на Денот на државноста на БиХ почна со интонирање на химната и кревање на знамето на ридот Хум над Сараево.