June 25, 2022 07:37
Свет

Австрија продолжува уште половина година со контроли на границите кон Словенија и кон Унгарија

Австрија од полноќ за најмалку половина година ги продолжува граничните контроли кон Словенија и Унгарија. Станува збор за контроли воведени за време на мигрантскиот бран во 2015 година, а указот за продолжување го донесе министерот за внатрешни работи Герхард Карнер и стапува на сила од полноќ, а важи до 11 ноември.

Како причина за продолжување на граничната контрола во Шенген зоната, Австрија ја наведе секундарната миграција, која вклучува трансфер на бегалци од една во друга земја на ЕУ, како и заштита на надворешните граници на ЕУ. Дополнително, Виена тврди дека постои опасност од тероризам и организиран криминал.

„Предизвиците за внатрешната безбедност на Европа се големи поради моменталната ситуација. Посебно поради војната во Украина, трговијата со луѓе е во пораст и затоа ни е потребна силна заштита на надворешната граница”, се наведува во образложението испратено до Европската комисија.